時間真係過得好快，咁快就過咗半年。。。。

作為媽媽的應該總有點感想才是啊！記得熙熙滿半歲時我都寫咗篇湊仔感想，仲記得寫得好鬼辛酸，字裡行間有滴滴眼淚。因為呢個仔特別難湊，唔係唔肯食奶呢就係食完幫我嘔嗮出黎，後來食粥又嘔，食任何嘢都可以無端端嘔，剩係擔心佢食一方面都用咗唔少心血。

好喇！言歸正轉，到咗妹妹半歲應該都有好多感想先係o架，但係我想來想去，好似唔多覺辛苦。妹妹係我心目中，就係我的happy angel。可能上天見我上次實在太辛苦，知道再加workload比我，我實頂唔順，所以比翻D甜頭我。

妹妹好易湊，佢唔鐘意喊，除咗肚餓，眼瞓，或者熟睡中比阿哥吵醒會喊之外，真係好少聽見佢喊。兩個月左右戒咗夜奶一覺瞓到天光，比我地有覺好瞓。吃奶沒問題, 體重維持在75條線左右，令我地擔心少好多野。平日最鐘意笑，無情情望著你笑，你同佢講嘢，佢會同你笑。放佢攞床仔，佢會伸長條頸，四圍搵人同佢玩，萬一比佢見到你望著佢，佢一定會同你甜笑，直至你唔舍得走開唔理佢。呢D搵人玩，搵人抱的策略係邊個教架？我無教過佢喎？點解佢會識用呢D招數？

我地全家人都好鍚佢，連熙熙都係，成日搵妹妹，成日走去鍚妹妹，見妹妹喊就會第一時間飛樸去拍下佢又或者拉響床邊個音樂盒。

妹妹，希望你長大後都是人見人愛的happy angel啦。

體重： 16.6lb